ކުޑަކުދިންނަށް އަނިޔާކުރުމާއި، ކުދިންނާމެދު ބަދުއަޚްލާޤީ ޢަމަލު ހިންގާ މައްސަލަތަކުގަޔާއި، މަސްތުވާތަކެތީގެ ވިޔަފާރީކުރާ މީހުންގެ މައްސަލަތަކާއި، ދައުލަތުގެ މުދަލަށާއި ފައިސާއަށް ޚިޔާނާތްތެރިވާ މީހުންގެ މައްސަލަތަކުގައި، އެމައްސަލަތަކަށް ޚާއްޞަ ސަމާލުކަމެއް ދެއްވައިގެން، އެމައްސަލަތަކަކީ އަވަސް މައްސަލަތަކެއްގެ ގޮތުގައި ކުރިއަށް ގެންދަވައި ނިންމެވުމަކީ، އަޅުގަނޑުމެން މި އުންމީދުކުރާ ހެޔޮވެރިކަމަށް ކޮންމެހެން ބޭނުންތެރިކަމެއްކަމުގައި ރައީސުލްޖުމްހޫރިއްޔާ މުހައްމަދު ނަޝީދު ވިދާޅުވެއްޖެއެވެ.

ރައީސް ނަޝިދު މިހެން ވިދާޅުވީ ރޭޑިޔޯ މެދުވެރިކުރައްވާ މިއަދު ހެނދުނު ދެއްވި 4 ވަނަ ޚިތާބުގައެވެ. ކުރީ ހަފްތާއެކޭ އެއްފަދައިން މި ހަފްތާގެ ޚިތާބުގައިވެސް ޝަރުއީ ދާއިރާގެ މަސައްކަތްތައް ހަލުވި ކުރުމުގެ މުހިއްމުކަމުގެ މައްޗަށް ރައީސް ބައްލަވާލެއްވިއެވެ.

ޝަރްޢީ ނިޒާމު އެކަށީގެންވާ ހަލުވިމިނެއްގައި ހިނގަމުންދިޔުމަކީ، ސަރުކާރުންވެސް އަދި ދިވެހި ރައްޔިތުންވެސް ވަރަށްބޮޑު އަހަންމިއްޔަތުކަމެއް ދެއްވަންޖެހޭ ކަމެއް ކަމަށާއި، ޢަދުލު އިންޞާފު ޤާއިމުކުރުން ލަސްވެގެން ދިޔުމަކީ، ޢަދުލު އިންޞާފު ނުލިބުން ކަމުގައި ބެލެވޭ ބެލުމަކީ ޢާންމު ގޮތެއްގައި ގަބޫލުކުރެވޭ ހަމައެއް ކަމުގައި އެމަނިކުފާނު ވިދާޅުވިއެވެ.

މިރޮނގުން ރައީސް ވާހަކަ ދައްކަވަމުން، ކޯޓުތަކަށް ހުށަހެޅޭ މައްސަލަތައް، ދުވަހުން ދުވަހަށް އިތުރުވަމުންދާކަމަށާ މިއިތުރުވަމުންދާއިރުގައި، ކޯޓުތަކުގެ ވަސީލަތްތައް އިތުރުކުރުމަކީ ކޮންމެހެން ބޭނުންތެރި ކަމެއްކަން ފާހަގަކުރެއްވިއެވެ. އެގޮތުން ކޯޓުތަކަށް ބޭނުންވާ ވަސީލަތްތައް ހަރުދަނާ ކުރުމަށް ޖުޑީޝަލް ސަރވިސް ކޮމިޝަނުން ކޯޓުތަކަށް ދޭންޖެހޭ އެއްބާރުލުންދީ، ޖުޑީޝަލް ސަރވިސް ކޮމިޝަނުން ކޯޓުތަކަށް ފަނޑިޔާރުން ޢައްޔަން ކުރުމުގައި ގެންގުޅުއްވާ މިންގަނޑުތައް އަލުން މުރާޖަޢާ ކުރުން އެއީ، ކޮންމެހެން މިވަގުތު ބޭނުންވެފައިވާ ކަމެއް ކަމުގައި އެމަނިކުފާނު ވިދާޅުވިއެވެ.

ރާއްޖޭގެ ތަރައްޤީއަށް ބޭނުންވާ ބޭރުގެ އެހީ ލިބޭނެ ފުރްޞަތުތައް ދިރާސާ ކުރެވި، އެފަދަ އެހީތައް ހޯއްދެވުމާ ގުޅޭގޮތުން ވާހަކަ ދައްކަވަމުން ރައީސް ނަޝީދު ވިދާޅުވީ މިދިޔަ ހައެއްކަ މަސްދުވަހުގެ ތެރޭގައި ފާހަގަވި އެއްކަމަކީ، ރާއްޖެއަށް ބޭރުގެ އެހީ ވަރަށްގިނަ ޢަދަދަކަށް ޙަޤީޤަތުގައި ލިބެމުން އެބަދާކަންކަމާ އަދި އެހީ ރަނގަޅު ގޮތުގައި އަޅުގަނޑުމެންނަށް ބޭނުންކުރެވެންވެސް އެބައޮތްކަމެވެ. އެހެންވީމާ، މިކަންކަން ފުރިހަމައަށް ކުރުމަށްޓަކައި މިނިސްޓްރީ އޮފް ފޮރިން އެފެއާޒާއި، މިނިސްޓްރީ އޮފް ފިނޭންސް އެންޑް ޓްރެޜަރީއިން ކުރައްވަމުން ގެންދަވާ މަސައްކަތްތައް، ތަންކޮޅެއް ބޮޑަށް އެކުލަވާލުމަށްޓަކައި އަދި ގުޅުވާލުމަށްޓަކައި ރައީސުލްޖުމްހޫރިއްޔާގެ އޮފީހުގެ ދައުރެއްވެސް އޭގައި ހިމެނުމަށް ފެނިވަޑައިގްނަވާތީ ވަޒީރުންގެ މަޖިލީހުގެ މަޝްވަރާގެ މަތިން، މިހާރު މިވަނީ ނައިބުރައީސް ބަލަހައްޓަވާ މަސައްކަތެއްގެ ގޮތުގައި، އެމަސައްކަތް ކަނޑައަޅާފައި ކަމުގައި ރައީސް ވިދާޅުވިއެވެ.

ނޫސްވެރިކަމުގެ ދާއިރާގައި ސަރުކާރުން މިހާރު އެހީވެދެވެނީ ސަރުކާރުގެ އިޢްލާނުތައް މެދުވެރިކޮށް، ޗާޕުވެގެން ނުކުންނަ ބައެއް ނޫސްތަކަށް އެކަނި ކަމަށްވާތީ އަދި އެއީ އެންމެ އިންޞާފުވެރި ގޮތުގައި ކަމުގައި ފެނިވަޑައިނުގަންނަވާތީ 1 ސެޕްޓެމްބަރުން ފެށިގެން ސަރުކާރުގެ އިއުލާނުތައް ހަމައެކަނި ސަރުކާރުގެ ގެޒެޓްގައި ޝާއިޢު ކުރުމަށް ވަޒީރުންގެ މަޖިލީހުން މިހާރު ނިންމާފައިވާކަން މި ޚިތާބުގައި ރައީސް ނަޝީދު ފާހަގަކުރެއްވިއެވެ.

ސަރުކާރުން ދޭ އިނާމުތައް ރައްޔިތުންނަށް ދިނުމާ ގުޅޭގޮތުންވެސް މިދިޔަ ހަފްތާގެ ތެރޭގައި ވަޒީރުންގެ މަޖިލީހުން ބައެއް ކަންކަން ނިންމަވާފައިވާކަންވެސް ރައީސްގެ މިއަދުގެ ޚިތާބުގައި ފާހަގަކުރެއްވިއެވެ. މިހާރު ފެހިފަތް، ދޭތެރެ ދުރުކުރުމުގެ އިނާމު ފަދަ އެތައް ބާވަތެއްގެ އިނާމު ހުރުމާއެކު އެއްހަމައަކަށް ހުރިހާ އިނާމެއް ގެނައުމަށް ވަރަށްބޮޑު ވިސްނެވިކަން ރައީސް ފާހަގަކުރެއްވިއެވެ. މި އިނާމުތައް އެއްހަމައަކަށް ގެނެސް، ނުވަތަ ސަރުކާރުގެ ފަރާތުން ހެޔޮގޮތުގައި ކަންތައްތައް ކުރާ މީހުން ފާހަގަކުރާނެ މިންގަނޑަކީ ކޮބައިތޯބަލާ އެ މިންގަނޑާ ގުޅޭގޮތުން ވަޒީރުންގެ މަޖިލީހުގެ ކޮމިޓީއަކުން މިހާރު މިވަނީ އާ ގޮތްތަކެއް ނިންމާފައިކަމަށާއި އިރާދަކުރެއްވިއްޔާ، މިއަންނަ ނޮވެމްބަރު 11 އިންފެށިގެން ދެން ޢަމަލު ކުރެވެމުންދާނީ، މިދެންނެވި އާ ގޮތްތަކަށްކަމަށް ރައީސް ވިދާޅުވިއެވެ.

މިއަދުގެ ޚިތާބު ނިންމާލެއްވުމުގެ ކުރިން މާދަމާ ތިން ދުވަހުގެ ދަތުރެއްގައި އިނގިރޭސިވިލާތަށް ފުރާވަޑައި ގަންނަވާކަން ހާމަކުރެއްވިއެވެ. ރައީސް ވިދާޅުވީ މިދަތުރަކީ، އިނގިރޭސިވިލާތުގެ ޕާލަމެންޓްގައި ތަޤްރީރު ކުރުމަށް ލިބުނު ފުރްޞަތެއްގެ ބޭނުން ހިފުމަށްޓަކައި ކުރައްވާ ދަތުރެއްކަމަށެވެ. އަދި މިދަތުރުގައި އޮކްސްފޯޑް ޔުނިވަރސިޓީގައި މޫސުމަށް އަންނަ ބަދަލުތަކާ ގުޅޭގޮތުން އެމެރިކާގެ ކުރީގެ ސިޔާސީ ވަރަށް މަޝްހޫރު ބޭފުޅެއްކަމަށްވާ އަލްގޯ ހިންގަވާ ޕްރޮގްރާމެއްގައިވެސް ބައިވެރިވެވަޑައިގަންނަވާނެކަމުގައެވެ.