ޑރ. އަފްރާޝީމް ފަހަތްޕުޅުގައި ނަމާދު ނުކުރުމަށް ގޮވާލާ ދީނީ އިލްމުވެރިންތަކެއް ފަތުވާ ނެރުއްވައިފި އެވެ.

ދީނީ ޖަމިއްޔާއެއް ކަމަށްވާ ޖަމިއްޔަތުއް ސަލަފުން ޑރ.އަފްރާޝީމް އަލީއާ މެދު ނެރެފައިވާ ގަރާރެއްގައި ދީނީ އިލްމުވެރިންތަކެއް ގޮވާލާފައިވަނީ އެންމެހާ ޝިރުކީ އަގީދާތަކާއި ފާސިދު އަމަލުތަކާއި ބާތިލްކަންކަމުން އެއްކިބާވެ, ޑރ.އަފްރާޝީމް އަލީ ތައުބާވެއްޖެކަން އިއުލާން ކުރަންދެން އަފްރާޝީމްގެ ފަހަތުގައި އިގްތިދާއުވުމީ ހުއްދަކަމެއް ނޫން ކަމެއް ކަމަށެވެ.

ގަރާރެއްގެ ސިފައިގައި ނެރެފައިވާ މިފަތުވާ ގައި 16 އިލްމުވެރިއަކު ސޮއިކުރައްވާފައި ވެއެވެ. އެބޭފުޅުންގެ ތެރޭގައި ޑރ.އަބުދުލް މަޖީދު އަބުދުލް ބާރީއާއި, ޑރ.އަބުދުއް ސައްތާރު އަބުދުއްރަހުމާނާއި, ޝައިޚް އިސްމާއިލް މުހަންމަދާއި, ޝައިޚް މުހަންމަދު ލަތީފު އަލީއާއި, ޝައިޚް ހަސަން ފިކުރީ އާއި ޝައިޚް އަހުމަދު އަބުދުﷲ ދީދީ އާއި, ޝައިޚް ޝުއައިބު އަބުދުއް ރަހްމާނާއި ޝައިޚް އަބޫބަކުރު އިބްރާހިމާއި ޝައިޚް އާދަމް ނަސީމާއި, ޝައިޚް ޔައުގޫބު އަބުދުއްރަހުމާނާއި, ޝައިޚް މުހަންމަދު ނަޝީދު އާދަމާއި ޝައިޚް އުސްމާނު އަބުދުﷲ އާއި ޝައިޚް އާދަމް ޝަމީމާއި ޝައިޚް އިމްރާން އަބުދުﷲ އާއި ޝައިޚް މުހަންމަދު ޝަހީމް އަލީ ސައީދު ހިމެނި ވަޑައިގަންނަވަ އެވެ.

މިބޭފުޅުން ސޮއިކުރައްވާފައިވާ ގަރާރުގައިވަނީ ޑރ.އަފްރާޝިމް އަލީ ދައްކަވާ ވާހަކަތަކުންނާއި އަމަލުކުރައްވާ ގޮތްތަކުން ދިވެހި ރާއްޖެއާއި ދުނިޔޭގެ އެކިއެކިކަންކޮޅުތަކުގައި ތިއްބެވި, އިތުބާރު ހިފޭ ދިވެހި ރާއްޖޭގެ ދީނީ އިލްމުވެރިން އޭނާގެ އުސޫލުތަކާއި ވާހަކަތަކަށް އިންކާރުކުރައްވާ އޭނާގެ މައްސަލައާމެދު ކަންބޮޑުވާ ހިސާބަށް ދިއުމީ އިލްމުވެރިންގެ މަގުން އޭނާ އެއްކިބާވެފައިވާކަން އެނގިފާޅުވާ ކަމެއް ކަމަށެވެ.

އަފްރާޝީމްގެ ސަބަބުން ދީނާމެދު ޝައްކު އުފެދި, ދީނުގެ ހައިބަތާ ގަދަރު ކުޑަވެ, ދީނުގެ ކަންކަމަކީ ފުރައްސާރައަކަށް ވީ ހިނދު އޭނާގެ އަމަލުތަކާއި ފަތުވާތައް, ޖަމިއްޔަތުއް ސަލަފުން ދިރާސާ ކުރުމުށްފަހު 15 ކަމެއް ފާހަގަކޮށް އެގަރާރުގައި ހުށަހަޅާފައި ވެއެވެ.

އެ ކަންކަމުގެ ތެރޭގައި ރަސޫލާގެ ސުންނަތާއި ސަލަފުއް ޞާލިހުންގެ މަންހަޖާ ޚިލާފުވެފައި ވުމާއި, ތައުހީދަށް ފުށޫ އަރާއެތައް ކަމަކަށް ގޮވާލާފައިވުމާއި މިއުޒިކަށް ތަރުހީބުދީފައިވުން ފަދަ ކަންކަން ފާހަގަ ކޮށްފައި ވެއެވެ.

” މިހާލުގައި ވަނިކޮށް އޭނާގެ ކިބައިން ދީނީ ފަތުވާއާއި ދީނުގެ އެއްވެސް ވާހަކައެއް އަޑުއެހުމަކީވެސް ހޮޔޮވާނޭ ކަމެއްނޫންކަމަށް މިޖަމިއްޔާއިން ސަރީހަ އިބާރާތުން ބަޔާންކޮށް އެންމެހާ މުސްލިމުންނަށް އަންގަމެވެ.“ ސަލަފުން ނެރުނު ގަރާރުގައި ވެއެވެ.

މި ގަގާރު ނިންމާލަމުން ޑރ. އަފްރާޝީމް, އޭނާ ހެއްދެވި ފަރާތަށް ބިރުވެތިވުމަށް ގޮވާލާފައި ވެއެވެ.

މީގެ ކުރިންވެސް އަފްރާޝީމްގެ މައްސަލާގައި ދީނީ އިލްމުވެރިން ހިތްހަމަ ނުޖެހުން ފާޅުކޮށްފައި ވެއެވެ. އަދި ޑރ.އަފްރާޝިމް އިމާމުވެ ނަމާދު ކުރައްވަނިކޮށް ބައެއް މީހުން ޖަމާއަތް ދޫކޮށްލާފައި ވެއެވެ. މީގެ އިތުރުން އިސްލާމީ ކަންތައްތަކާ ބެހޭ އެންމެ މަތީމަޖިލީހުންވެސް އަފްރާޝީމަށް ނަސޭހަތް ދެއްވާފައި ވެއެވެ.